Frjálsíþróttamaðurinn Patrekur Andrés Axelsson hefur lokið keppni á Paralympics í Tokyo en hann setti nýtt Íslandsmet í undanrásum í 400m hlaupi T11. Þá eru Már Gunnarsson, ÍRB, og Thelma Björg Björnsdóttir, ÍFR, komin í úrslit kvöldsins í sundi. Bergrún Ósk Aðalsteinsdóttir verður svo í úrslitum í kúluvarpi á eftir.
Þessi fyrri partur keppnisdagsins hófst á því að Már tryggði sér sæti í úrslitum kvöldsins í 100m baksundi S11. Már var með þriðja besta tímann inn í úrslitin þegar hann kom í bakkann á 1:10,90 mín. en Íslandsmet hans í greininni er 1:10,43 mín. sem hann setti á HM í London árið 2019. Þá var hann heldur ekki fjarri metinu á 50 metrum en það er 32,83 sek en millitími Más í undanrásum var 33,71 sek.
Thelma Björg Björnsdóttir varð svo áttunda inn í úrslit kvöldsins í 100m bringusundi SB5 þegar hún synti á tímanum 1:54.02 mín. en Íslandsmet hennar í greininni er 1,52,79 mín. Hin breska Harvey Grace var fyrst eftir undanrásirnar á tímanum 1:42,09 mín.
Í undanrásum þennan morguninn var Patrekur Andrés Axelsson síðastur á svið þegar hann keppti í 400m spretthlaupi T11 (blindir). Patrekur kom í mark á nýju Íslandsmeti eða á 56,73 sek. og varð sjöundi eftir undanrásirnar sem töldu þrjá riðla. Þrír efstu í hverjum riðli og fjórði besti tíminn í heild komast svo áfram og keppa í úrslitum. Ríkjandi Íslandsmet Patreks var 56,95 sek. svo honum tókst að bæta það í dag á stóra sviðinu!
Myndir/ JBÓ – Már og Patrekur í undanrásum morgunsins í Tokyo.
