Við hjá Hvata flytjum ekki einvörðungu tíðindi af framgangi mála í íþróttum fatlaðra en innan okkar raða er að finna margs konar hæfileikaríkt fólk. Tvö þeirra sameinuðu krafta sína á dögunum og fengu heldur betur glæsilegar viðtökur.
Sundmaðurinn Már Gunnarsson hefur getið sér gott orð bæði í sundlauginni og á tónlistarsviðinu og kollegi hans, Iva Marín Adrichem, sömuleiðis en Iva staldraði stutt við í sundlauginni og hefur einbeitt sér meira að tónlistinni síðustu árin.
Már og Iva gerðu sína eigin útgáfu af laginu „Barn“ eftir Ragnar Bjarnason við ljóð Steins Steinarr. Lagið er í sumarbúningi með reggíklæðningu. Myndband þeirra hefur fengið góðar viðtökur á YouTube og er tekið upp í Garðskaga og Sandvík á Reykjanesi. Hilmar Bragi Bárðarson, fréttastjóri Víkurfrétta á Suðurnesjum, tók upp og setti saman myndbandið við lagið sem hefur fengið yfir 100.000 spilanir á Facebook og þá skipta spilanir einnig þúsundum á YouTube og Spotify.
Ljósmyndir/ Hilmar Bragi Bárðarson – www.vf.is
