Sundmaðurinn Már Gunnarsson lokaði í gær þátttöku Íslands á Paralympics í Tokyo þegar hann tók þátt í undanrásum í 100m flugsundi S11 (blindir). Þetta var fjórða og síðasta grein Más við mótið og síðasta greinin hjá íslenska hópnum.
Már synti á 1:14,86 mín. en sá tími dugði honum ekki til að ná inn í úrslitasundið en af fjórum greinum komst hann í tvígang í úrslit.
Már verður fánaberi Íslands við lokaathöfn Paralympics þann 5. september. Þegar hefur hluti hópsins haldið heim til Íslands en fyrir mót var vitað að keppendur og starfslið þeirra þyrftu að kveðja Paralympic-þorpið ekki síðar en 48 tímum eftir að þeirra keppni lýkur.
Við á hvatisport.is munum halda áfram að greina frá Paralympics enda af nægu að taka við þessa athyglisverðu leika sem fóru fram í svokallaðri „sóttvarnabúbblu.“
