Handahjólreiðakonan Arna Sigríður Albertsdóttir verður sjötti fulltrúi Íslands á Paralympics í Tokyo dagana 24.ágúst – 5. september næstkomandi. Alþjóðahjólreiðasambandið úhlutaði nýverið úr svokölluðum umsóknarsætum þar sem Arna var ein þeirra sem varð fyrir valinu.
Arna hefur varðað leiðina á Íslandi í handahjólreiðum kvenna og fagnaði gríðarlega þegar Íþróttasamband fatlaðra fékk það skemmtilega verkefni að tilkynna henni um niðurstöðu alþjóða hjólreiðasambandsins.
Fyrir höfðu Már Gunnarsson, Thelma Björg Björnsdóttir, Róbert Ísak Jónsson, Bergrún Ósk Aðalsteinsdóttir og Patrekur Andrés Axelsson verið komin með farseðilinn til Tokyo. Már, Thelma og Róbert keppa í sundi en Bergrún og Patrekur í frjálsum.
Arna Sigríður verður þar með fyrst íslenskra kvenna til að keppa í hjólreiðum á Paralympics. Til hamingju Arna Sigríður!
