Í dag hófst keppni á Evrópumeistaramóti IPC í frjálsum íþróttum en mótið fer fram í Póllandi. Stöllurnar Ingeborg Eide Garðarsdóttir og Hulda Sigurjónsdóttir riðu á vaðið þar sem Ingeborg landaði nýju Íslandsmeti í kringlukasti.
Ingeborg Eide, Ármann, keppti í sameinuðum flokki F37/38 (hreyfihamlaðir) og kastaði kringlunni lengst 20,64 metra sem er nýtt Íslandsmet. Ingeborg hafnaði í 5. sæti en gullið fór til Tékklands þar sem Eva Datinska kastaði 26,78 metra. Til hamingju með Íslandsmetið Ingeborg!
Kastsería Ingeborgar í kringlunni í dag: 18,85 – 20,64 – X – X – 20,15 – 20,44
Hulda Sigurjónsdóttir, Ármann, keppti í kúluvarpi F20 þar sem hún hafnaði í 11. sæti en þar með hefur Hulda lokið keppni þar sem hún var aðeins skráð í kúluvarp þetta mótið. Kastsería Huldu var eftirfarandi: 9,13 – 9,77 – 9,37
Keppni heldur áfram á morgun en hægt er að fylgjast með í beinni netústendingu á Facebook-síðu ÍF.
