Skíðavertíðin hófst með látum hjá Hilmari Snæ Örvarssyni í Hollandi þetta árið þegar hann vann til tvennra verðlauna á IPC-mótum sem fram fóru í inniaðstöðunni í Landgraaf. Hilmar var aðeins skráður til leiks í svigkeppnum mótanna.
Ólíkt reglum annarra móta á komandi tímabili voru þrjár ferðir í hverju móti og tíminn í öllum ferðum síðan lagður saman. Fyrstu tvö mótin voru minni í sniðum, mót á vegum IPC þar sem Hilmar hafnaði á tveimur keppnisdögum í 3. og 4. sæti. Að IPC-mótunum loknum tóku við fyrstu keppnisdagarnir á Evrópumótaröðinni. Þar ætlaði Hilmar að leggja allt í sölurnar en lítil mistök í fyrstu ferð fyrra mótsins leiddu til þess að honum hlekktist á og lauk því ekki keppni. Á lokakeppnisdeginum gekk svo nánast allt upp þar sem hann var með annan besta tímann í fyrstu og annarri ferð en besta brautartímann í þeirri síðustu og hafnaði í öðru sæti mótsins.
Eftir fyrstu tvö mótin af átta í EC-svigmótaröðinni er Hilmar Snær í 3. sæti stigalistans. Núna 18. desember keppir hann í St. Moritz og svo strax í janúarmánuði verður nóg við að vera hjá Hilmari á meginlandi Evrópu, svo fylgist vel með á ifsport.is.
