Sundmennirnir Már Gunnarsson og Róbert Ísak Jónsson verða báðir í úrslitum kvöldsins á Evrópumeistaramóti IPC í sundi sem nú stendur yfir í Madeira í Portúgal.
Már synti sig inn í úrslit í 100m skriðsundi og Róbert í 200m fjórsundi. Róbert var fyrri til í undanrásum af íslensku keppendunum en hann synti á 2:16,78 mín. og var þriðji inn í úrslitin.
Met Róberts í greininni er 2:14,16 mín. og hefur staðið frá því á EM í Dublin 2018. Fróðlegt verður að sjá hvort Róbert geri atlögu að metinu í úrslitum kvöldsins.
Már kom í bakkann á 1:05,38 mín. og varð áttundi inn í úrslit kvöldsins. Met Más í greininni er 1:02,96 mín. en metið setti hann í aprílmánuði á Íslandsmóti ÍF og SSÍ í Laugardal.
Hægt verður að fylgjast með úrslitum kvöldsins í beinni á Facebook-síðu ÍF
Mynd/ Sandra – Már og Róbert að synda sig niður eftir undanrásir morgunsins í Portúgal.
