Hilmar Snær Örvarsson hafnaði í sjötta sæti í stórsvigi á Evrópumótaröð IPC í dag. Þetta var annar keppnisdagurinn í röð í stórsvigi en í gær var keppt á landsmóti Liechtenstein. Hilmar var fimmti eftir fyrri ferðina í morgun en lauk keppni í sjötta sæti.
Skíðamaðurinn fór ekki leynt með að hann hafi verið fremur ósáttur við skíðamennskuna í seinni ferðinni en tæpum fjórum sekúndum munaði á fyrri og seinni ferð í dag hjá Hilmari.
Eftir keppni í dag tóku flestir keppendur létta æfingu í svigi en á morgun og föstudag fer fram svigkeppnin á mótinu. Fyrri dagurinn er svigkeppni á landsmóti Liechtenstein og á föstudag er svigkeppnin á Evrópumótaröð IPC (International Paralympic Committee).
Sigurvegari dagsins líkt og í gær var Frakkinn Arthur Bauchet en hann virðist algerlega óstöðvandi í brekkunum þessi misserin og landar gulli hvert mótið á fætur öðru. Það verður fróðlegt að fylgjast með keppni morgundagsins en svig er sterkari greinin af þessum tveimur hjá Hilmari.
Myndir/ JBÓ: Hilmar Snær í fyrri ferð dagsins í stórsvigi.
