Í desembermánuði 2020 voru þau Hilmar Snær Örvarsson og Bergrún Ósk Aðalsteinsdóttir útnefnd íþróttamaður- og íþróttakona ÍF. Við athöfnina var þeim báðum afhentir nýir og glæsilegir farandbikarar sem fylgja munu íþróttafólki ÍF næstu 20 árin. Smíðin var í höndum SIGN í eigu þeirra Sigurðar Inga og Kötlu Guðmundsdóttur.
Við athöfnina í desember fór Katla með eftirfarandi erindi í tilefni af nýju gripunum. Íþróttasamband fatlaðra þakkar SIGN fyrir einkar gott samstarf og einstaklega vel heppnaða verðlaunagripi sem munu næstu tvo áratugina svo sannarlega setja mark sitt á hófið:
Styrkur á sér alltaf sögu. Hann er skilgetið afkvæmi hugrekkis og þrautseigju – ofinn úr sætustu sigrunum og sárustu sorgunum. Hann eflist í hvert sinn sem kjarkurinn og kvíðinn kljást, í hvert sinn sem ákveðnin nær að yfirbuga efasemdirnar. Það er styrkurinn sem hvað eftir annað sýnir fram á að hindranir eru fyrst og fremst huglægar; vandamál eru verkefni og áskoranir oftar en ekki ótrúleg ævintýri.
Í gegnum tíðina hafa hin tígulegu hreindýr verið sveipuð ákveðinni dulúð. Blíðleg ásýnd þeirra þykir stinga í stúf við baráttugleðina þegar þeir þurfa að verja sig og sína. Ótrúlegir forystuhæfileikar leynast undir fínlegum og fáguðum hreyfingunum. Hreindýrið hefur verið aðalpersóna ótal ævintýra og verndardýr fjölmargra þjóðflokka – og ekki að ástæðulausu. Til að sigrast á óblíðum náttúruöflum býr hreindýrið yfir einstakri aðlögunarhæfni og útsjónarsemi. Þetta tignarlega dýr er í hugum margra tákn þrautseigju, innsæis, guðlegrar forsjónar og sigurs.
Hreindýrshornið í þessum grip er því hvort tveggja í senn; hvatning og vernd verðlaunahafanna. Vitnisburður um að sigur lýtur ekki alltaf lögmálum og líkum.
Grunnurinn sem gyllta sigurskálin stendur á er borð úr gömlu bryggjunni í Reykjavík. Þar stóðu forfeður okkar og horfðu út á haf áður en lagt var í leiðangra. Rétt eins og afreksíþróttamenn gerðu þeir áætlanir; mátu veður, vinda og viðsjárverða strauma. Bryggjan var þannig upphafspunktur hvers ævintýris – en einnig áfangastaður. Bryggjan er ávalt merki um að við séum komin í höfn – markmiðinu sé náð.
Þessi gripur er til heiðurs þeim afburða einstaklingum sem hafa sýnt framúrskarandi styrk og stefnufestu og hafa með óbilandi elju náð hinu æðsta takmarki; að sigrast á sjálfum sér. Hann er óður til alls þess sem þetta afreksfólk hefur áorkað, barist fyrir og sigrast á.
Hönnun og smíði Sign ehf,
Sigurður Ingi og Katla Guðmundsdóttir
