Vinsæl nýbylgja frá Ungverjalandi ryður sér nú til rúms á íþróttasviðinu en sú grein heitir „Teqball“ eða tæknibolti ef svo má að orði komast á íslensku. Teqball er knattspyrnutengd íþrótt með borðtennisívafi þar sem leikmenn mætast með fótbolta við sérhannað borðtennisborð. Ungverjar hafa verið leiðandi afl í greininni en árið 2017 var Federation Internationale de Teqball stofnað í Ungverjalandi.
Síðustu ár hefur ör vöxtur verið í greininni og nú hafa Ungverjar sett á laggirnar „Para Teqball“ í viðleitni sinni til þess að gera íþróttina enn aðgengilegri. Nú í fyrstu er ráðgert að keppt verði í tveimur flokkum í Para Teqball þar sem flokkur 1 verði fyrir það íþróttafólk sem notast við hækjur og flokkur tvö fyrir það íþróttafólk sem notast við stoðfætur.
Við þetta upphaf hjá Para Teqball hafa alþjóðasamtökin gefið út nýtt regluverk fyrir greinina sem og flokkunarleiðbeiningar. Alþjóða Para Teqball samtökin hafa þróað greinina fyrir fatlaða í nánu samstarfi við Íþróttasamband fatlaðra í Ungverjalandi og eru um þessar mundir að standa í yfirgripsmiklu kynningarstarfi um allan heim.
Eins og sakir standa er ÍF ekki kunnugt um að fatlaðir hafi prófað eða stundað greinina hérlendis en þetta er einkar spennandi viðbót í íþróttaflóruna og mun stjórn sambandsins fylgjast grannt með framvindu mála.
