Paralympics er stærsta afreksíþróttamót fatlaðra og fara leikarnir fram fjórða hvert ár. Síðast fóru Paralympics fram í Ríó de Janeiro í Brasilíu. Afreksfólk frá Íslandi hefur tekið þátt í leikunum allt frá árinu 1980 og unnið þar til samtals 98 verðlauna.
Paralympics fara nú í dag ávallt fram í sömu borg og við sömu aðstæður og Ólympíuleikarnir. Þessi risavaxna íþróttahátíð hefst með setningu Ólympíuleikanna og lýkur með lokaathöfn Paralympics. Á milli Ólympíuleika og Paralympics líða að jafnaði tvær vikur þar sem mótshaldari gengur frá eftir Ólympíuleika og undirbýr komu keppenda á Paralympics.
Flest þekkjum við orðið þær greinar sem eru í boði á Ólympíuleikunum en á Paralympics er að mestu leyti um sömu íþróttagreinar að ræða, sumar aðlagaðar og aðrar sem ekki er að finna inni á Ólympíuleikum eins og t.d. hjólastóla-rugby eða eins og íþróttin hefur oft verið nefnd, Murderball.
Paralympics áttu að fara fram í ágúst og september á þessu ári en var eins og flestir þekkja frestað til ársins 2021. Greinaröðin hefur þó lengi legið fyrir en keppt verður í 22 íþróttagreinum í Tokyo á næsta ári og innan hverrar greinar má finna fjölda fötlunarflokka en í grófum dráttum skiptast þeir í keppnir hreyfihamlaðra, sjónskertra og blindra og svo þroskahamlaðra. Hér að neðan má sjá lista yfir þær 22 greinar sem keppt verður í á leikunum í Tokyo á næsta ári.
Frjálsar íþróttir • Bogfimi • Badminton • Boccia • Kanó-róður
Hjólreiðar (vegur/braut) • Hestaíþróttir • Fimm manna fótbolti
Markbolti/blindrabolti• Júdó • Lyftingar • Róður • Skotfimi
Sitjandi blak • Sund • Borðtennis • Taekwondo • Þríþraut
Hjólastólakörfuknattleikur • Hjólastólaskylmingar
Hjólastóla Rugby (Murderball) • Hjólastólatennis
