Már synti þrívegis undir gildandi heimsmeti á ÍM25
Íslandsmót ÍF í sundi í 25m laug fór fram í Ásvallalaug í Hafnarfirði í nóvembermánuði. Mótið var samkeyrt með Íslandsmóti SSÍ rétt eins og tíðkast hefur síðustu misseri hjá ÍF og SSÍ. Már Gunnarsson var í góðum gír við mótið og synti þrívegis undir gildandi heimsmeti í sínum flokki (S11-blindir). Már synti undir gildandi heimsmetum í 50m baksundi, 200m baksundi og 100m baksundi.
Róbert Ísak Jónsson setti Íslandsmet á mótinu í 200m fjórsundi S14 á tímanum 2:10,44 mín. og vann til silfurverðlauna er hann synti í úrslitum greinarinnar. Þá vann Róbert til bronsverðauna í 100m flugsundi á tímanum 58,58 sek. sem er nýtt Íslandsmet.
Þá féll 15 ára gamalt Íslandsmet Báru Bergmann í 50m flugsundi en það sló Þórey Ísafold Magnúsdóttir er hún kom í bakkann á 35,76 sek. í flokki S14.
Mynd/ Már Gunnarsson ásamt Davíð Hildiberg öðrum af tveimur þjálfurum sínum en hinn þjálfari hans er Steindór Gunnarsson.
