Paralympics 2020 fara fram í Tókýó, höfuðborg Japans, í lok ágúst og byrjun septembermánaðar. Íslenskir afreksmenn úr röðum fatlaðra munu því á næstu misserum gera lokaatlögu að því að vinna sér inn þátttökurétt á þessu stærsta móti fatlaðs afreksfólks.
Paralympics fara fram fjórða hvert ár strax í kjölfar Ólympíuleikanna en í dag er svo búið um hnútana að þær borgir sem sækja um að halda Ólympíuleika sækja líka um að halda Paralympics sem fara þá fram við sömu aðstæður hverju sinni. Sjálfir Ólympíuleikarnir fara fram 24. júlí – 9. ágúst og rúmum hálfum mánuði síðar eru fatlaðir afreksmenn í þúsundatali mættir í Ólympíuþorpið til að taka þátt í Paralympics.
Senn líður að því að lágmarkatími fyrir íþróttafólkið renni sitt skeið. Þar sem enginn íslenskur sundmaður vann gull- eða silfurverðlaun á HM og enginn íslenskur frjálsíþróttamaður náði 4. sæti eða ofar á HM var enginn íþróttamaður eftir sumarið kominn með beinan þátttökurétt á Paralympics. Íþróttasamband fatlaðra mun af þeim sökum ekki kynna keppendur Íslands í Tókýó fyrr en í sumarbyrjun 2020.
Paralympics í Tókýó hafa þegar farið fram úr væntingum þegar kemur að miðaeftirspurn á leikana og heimamenn hafa lagt mikið upp úr vistvænni framkvæmd mótsins. Sem dæmi má nefna að allir verðlaunapeningar á Paralympics verða úr endurunnum málmum, s.s. úr farsímum og öðrum tækjum.
Í Tókýó verður keppt í 22 íþróttagreinum þar sem badminton og Taekwondo koma inn á leikana í fyrsta sinn. Þetta er í annað sinn sem Tókýó heldur Ólympíuleika en þeir fyrstu fóru fram 1964 og hafa, eins og gefur að skilja, vaxið umtalsvert síðan þá og því verður þetta í fyrsta sinn samkvæmt nýju fyrirkomulagi sem Tókýó heldur bæði Ólympíuleika og Paralympics.
Búist er við því að um 4400 íþróttamenn taki þátt á Paralympics í 540 verðlaunagreinum en fjöldi þeirra skýrist að mestu leyti af þeim fjölda fötlunarflokka sem keppt er í við þær 22 greinar sem fram fara í Tókýó.
Á Paralympics 2016 tefldi Ísland fram fimm keppendum, þremur í sundi, einum í frjálsum og þá í fyrsta sinn keppti bogfimimaður fyrir Íslands hönd á Paralympics. Vonir standa til þess að Ísland nái jafnmörgum þátttakendum inn til Tókýó en keppnin er hörð og verður afar spennandi að sjá hverju vindur fram næstu mánuði.
