Íslandsmót Íþróttasambands fatlaðra í frjálsum íþróttum fór fram í Kaplakrika í júlímánuði. Veðurguðirnir léku við hvurn sinn fingur og íþróttafólkið þakkaði pent fyrir sig með miklum bætingum og þó nokkrum metum.
Ármenningar urðu sigurvegarar í liðakeppni með 12 gullverðlaun og ein silfurverðlaun á mótinu. Hulda Sigurjónsdóttir setti nýtt Íslandsmet í kúluvarpi F20-kvenna (þroskahamlaðir) þegar hún varpaði kúlunni 10,31 m og setti að auki nýtt met í sleggjukasti (30,10 m). Þá sigraði Hulda einnig í kringlukasti og varð önnur í spjótkasti með kasti upp á 24,24 m.
Stefanía Daney Guðmundsdóttir rauf fimm metra múrinn í langstökki kvenna F20 (þroskahamlaðir) þegar hún stökk 5,07 metra sem er nýtt Íslandsmet! Þá bætti hún einnig metin sín í 100 m og 200 m hlaupi.
Bergrún Ósk Aðalsteinsdóttir bætti svo metið í spjótkasti (500 g) í flokki F37 (hreyfihamlaðir) þegar hún kastaði spjótinu 21,69 m og þá hjó hún nærri Íslandsmetinu í sama flokki í langstökki þegar hún stökk 4,26 m en metið á Matthildur Ylfa Þorsteinsdóttir, sem er 4,28 m.
Mynd/ Kári Jónsson – Veðurblíðan lék við keppendur á Íslandsmóti ÍF í frjálsum í júlí.
