Global games fóru fram í Vichy í Frakklandi dagana 4.-10.júní. Ísland átti sjö keppendur á mótinu, fimm sem kepptu í sundi og tvo sem kepptu í frjálsum. Global Games eru heimsleikar VIRTUS sem eru samtök íþróttafólks með þroskahamlanir.
Keppendur í frjálsum voru þær Stefanía Daney Guðmundsdóttir og Hulda Sigurjónsdóttir. Frjálsarnar fóru rólega af stað á mótinu en keppni hjá þeim hófst ekki fyrr en á þriðjudag. Stefanía og Hulda höfðu þar með tvo daga til að taka því rólega, skoða keppnisaðstæður og ná inn æfingu. Stelpunum gekk vel á mótinu, komust í úrslit í öllum sínum greinum og voru nokkur SB, PB og Íslandsmet sett.
Stefanía keppti í bæði 200 m og 400 m hlaupi sem og langstökki. Hún gerði sér lítið fyrir og sló Íslandsmet í öllum sínum greinum. Stefanía hljóp 400m á tímanum 64,50 sek. og endaði í 8.sæti. Hún var í 7.sæti í 200m á tímanum 27,84 sek. og var einnig í 7.sæti í langstökki en þar stökk hún lengst 5,18m sem er 8 cm bæting og nýtt Íslandsmet!
Hulda keppti í flest öllum kastgreinum mótsins, þ.e. kúluvarpi, kringlukasti og sleggjukasti. Hulda stóð sig með prýði og átti gott mót. Hún var í 11.sæti í kúluvarpi þar sem hún kastaði lengst 9,44m. Í kringlunni varð hún í 8.sæti með kast upp á 28,70m og í sleggjunni kastaði hún lengst 30,57m og endaði í 6.sæti.
Keppendur í sundi voru þau Anna Rósa Þrastardóttir, Emelía Ýr Gunnarsdóttir, Róbert Ísak Jónsson, Snævar Örn Kristmannsson og Þórey Ísafold Magnúsdóttir Proppé.
Anna Rósa keppti í flokki II1 og keppti í 50, 100, 200, 400 og 1500 metra skriðsundi. Hennar besta sund var 1500 metra skriðsund þar sem hún bætti sig um tæpar tvær mínútur og endaði í 7. sæti á tímanum 22:31,55 mín.
Emelía keppti í flokki II1 og keppti í 50, 100 og 200 metra flugsundi auk 100 metra baksunds og 200 metra fjórsunds. Emelía komst í úrslit í 200 metra flugsundi og synti þar á tímanum 3:58,04 sem var þó ekki bæting á hennar besta tíma.
Róbert keppti í flokki II1 og keppti í 50 og 100 metra flugsundi, 50 metra baksundi auk 200 metra fjórsundi. Róbert komst inn í úrslit í 50 og 100 metra flugsundi auk 200 metra fjórsundi, en þar nældi hann sér í brons á tímanum 2:19,65.
Snævar keppti í flokki II3 og stóð sig með stakri prýði. Hann keppti í 50, 100 og 200 metra flugsundi, 50, 100, 200 og 400 metra skriðsundi auk 200 metra fjórsundi. Snævar var allt í öllu á Global Games og komst inn í úrslit í öllum sínum sundum nema 50 metra skrið og 200 metra fjór. Hann nældi sér í gull í 200m flug á tímanum 2:22,11, silfur í 100m flug á tímanum 1:03,30 og brons í 50m flug á tímanum 28,80.
Þórey keppti í flokki II3 og keppti í 50 og 100 metra bringusundi auk 50 og 100 metra flugsundi. Þórey komst inn í úrslit í 50 metra bringusundi og synti þar á tímanum 41,33.
Mynd/ Snævar Örn Kristmannsson sundmaður frá ÍFR náði glæsilegum árangri í flokki I3.
