Opna þýska meistaramótið stendur nú yfir í Berlín í Þýskalandi þar sem fjórir afrekssundmenn úr röðum fatlaðra eru mættir til keppni. Fyrsti keppnisdagur fór fram í gær þar sem Sonja Sigurðardóttir frá ÍFR setti tvö ný Íslandsmet í flokki S3 (hreyfihamlaðir).
Sonja synti þá á 2:36,09 mín. í 100m skriðsundi og 5:14,93 mín. í 200m skriðsundi. Sonja bætti þar verulega metin sín frá opna breska meistaramótinu fyrr á þessu ári. Þá kepptu Thelma Björg Björnsdóttir, ÍFR og Guðfinnur Karlsson, Firði einnig í gær þar sem bæði náðu sínum besta árangri á tímabilinu til þessa. Annar keppnisdagur stendur nú yfir en með þeim ytra er einnig Hjörtur Már Ingvarsson sundmaður úr Firði í Hafnarfirði.
Mynd/RR: Sonja Sigurðardóttir, ÍFR, alsæl með metin í Berlín.
