Vetrar Paralympics verða settir í Milano Cortina þann 6. mars næstkomandi og standa til 15. mars. Fulltrúi Íslands við leikana er Arna Sigríður Albertsdóttir frá Skíðafélagi Ísfirðinga. Arna verður fimmti Íslendingurinn í sögunni til þess að keppa fyrir Íslands hönd á Vetrar Paralympics.
Árið 1994 var það Svanur Ingvarsson frá Suðra sem reið á vaðið í Lillehammer í Noregi þegar hann keppti fyrir Ísland í svokölluðu sleðastjaki. Erna Friðriksdóttir frá Örvari/ÚÍA var svo næst árið 2010 þegar hún keppti í alpagreinum á leikunum í Vancouver. Þar með varð Erna fyrst íslenskra kvenna á Vetrar Paralympics og til dagsins í dag sú eina uns Arna tryggði sér þátttökurétt.
Árið 2014 var Erna aftur á ferðinni í Sochi í alpagreinum og með henni Jóhann Þór Hólmgrímsson frá Akri á Akureyri en bæði kepptu þau í sitjandi flokki í alpagreinum og Jóhann því fyrstur karla til að keppa í alpagreinum fyrir Íslands hönd. Urðu 2014 leikarnir síðustu leikar þeirra Ernu og Jóhanns en Hilmar Snær Örvarsson frá skíðadeild Víkings tók við keflvinu árið 2018 þegar hann keppti í alpagreinum í Peyong Chang í Suður-Kóreu. Hilmar fór svo á sína aðra leika árið 2022 í Peking sem gera hann og Ernu að einu Íslendingunum sem hafa tvívegis tekið þátt í Vetrar Paralympics.
Og núna með þátttöku Örnu Sigríðar verður hún fyrst kvenna á Íslandi til að keppa í skíðagöngu og fyrst kvenna til að keppa fyrir Íslands á Sumar- og vetrarleikum Paralympics þar sem hún keppti í handahjólreiðum í Tokyo 2020 (2021). Fyrstur karla til þess að vinna þetta afrek var Svanur Ingvarsson sem keppti 1994 á Vetrar Paralympics og svo 1992 á Sumar leikunum í Barcelona.
Þátttaka Íslands hófst því á vetrar Paralympics 1994 en síðan áttum við ekki keppanda fyrr en 2010 en eftir þá leika hefur Íslandi tekist að tryggja fulltrúa á leikana frá 2010 til dagsins í dag eða fimm leika í röð.
Um þessar mundir er Arna við æfingar í Noregi og fer beint þaðan til Ítalíu en keppnisdagar hennar eru 10. og 11. mars næstkomandi þar sem hún keppir í sprettgögnu og 10km göngu.
Hér má svo sjá lista yfir alla keppendur Íslands á Sumar og Vetrar Paralympics frá upphafi.
