Melkorka Rán Hafliðadóttir er nýr verkefnastjóri afreksmála hjá Íþróttasambandi fatlaðra og landsliðsþjálfari í frjálsum íþróttum.
Melkorka hefur frá árinu 2021 sinnt hlutastörfum fyrir ÍF en sumarið 2021 var hún á meðal starfsmanna sem fylgdu íslenska hópnum á Paralympics í Tokyo í Japan. Þar var hún bæði aðstoðarþjálfari og meðlimur í fararstjórn.
Kári Jónsson lauk samningi sínum sem landsliðsþjálfari ÍF um áramót en Kára verður seint fullþakkað fyrir sín öflugu störf sem landsliðsþjálfari ÍF í frjálsum íþróttum. Melkorka starfaði um hríð með Kára sem nefndarmaður í frjálsíþróttanefnd ÍF og hefur á síðustu árum gengið í fjölbreytt störf á vegum sambandsins.
Sem verkefnastjóri afreksmála fær Melkorka það verðuga verkefni að halda utan um fremsta afreksíþróttafólk landsins úr röðum fatlaðra.
Melkorka er með meistarapróf í íþróttafræðum frá Háskólanum í Reykjavík en þá hefur hún einnig sinnt styrktarþjálfun hjá Knattspyrnudeild KR, Körfuknattleiksdeild Aþenu og þjálfað frjálsar hjá FH um árabil. Þá var Melkorka annar tveggja Íslendinga sem sóttu námskeið Alþjóða Ólympíuakademíunnar sem fram fór í Ólympíu í Grikklandi í júní á síðasta ári.
Mynd/ JBÓ – Þórður Árni formaður ÍF og Melkorka Rán nýr verkefnastjóri afreksmála og landsliðsþjálfari í frjálsum íþróttum.
