„Vagninn með þessari hönnun mun fara á fleygiferð um landið eftir áramót og vekja mikla athygli. Hann á eftir að gleðja börnin sem munu nota hjólastólana en sýna á sama tíma að við þurfum að gera betur í þessum málaflokki,“ segir Valdimar Gunnarsson, verkefnastjóri Allir með, verkefnis sem hefur það að markmiði að fjölga þátttakendum með fötlun í starfi íþróttafélaga.
Valdimar afhenti í dag þremur nemendum á 2. ári í grafískri hönnun við Listaháskóla Íslands verðlaun fyrir myndskreytingar á yfirbyggðum vagni sem mun flytja íþróttahjólastóla á milli staða. Hjólastólarnir fjölga verulega börnum með fötlun til að stunda íþróttir. Hönnunarsamkeppnin var einstakt samstarfsverkefni Allir með og Listaháskóla Íslands.
Vagninn er nú hjá Marel, sem hefur hannað og er að smíða inniviði hans, svo hægt verði að koma tólf sérstökum hjólastólum fyrir í honum með góðu móti. Eftir það verður hann merktur með nýju hönnuninni.
Fyrstu verðlaun hlýtur Gunnar Karl Thoroddsen, nemi í grafískri hönnun og mun hönnun hans prýða Allir með-vagninn. Hann hlýtur 150.000 í verðlaun.
Þá var tillaga Kolfinnu Frigg Sigurðardóttur nema í grafískri hönnun valinn af dómnefnd sem annað sætið og hlýtur hún 100.000 krónur fyrir.
Tillaga John Berniel Gavilo Quirona nema í grafískri hönnun var valin í þriðja sætið og hlýtur hann 50.000 krónur fyrir.
Ítarlegar um verkin:
Dómnefnd sagði þetta um hönnun Gunnars Karls: Grípandi teikning þar sem bæði sjónarhorn og flæði í bakgrunni undirstrika hreyfingu og leik. Týpógrafía og merki sitja vel í rammanum, í góðu jafnvægi við myndlýsinguna. Bakgrunnurinn býður upp á tækifæri til þess að vinna samfelldan flöt yfir kerruna alla. Til að fá meiri fjölbreytileika á vagninn myndum við leggja til að öðrum karakterum í sama teiknistíl yrði bætt við og einnig fjölbreyttari tengingum við íþróttir þar sem þessi hópur sem mun njóta góðs af vagninum æfa fjölbreyttari íþróttir.
Dómnefnd sagði þetta um hönnun Kolfinnu: Unnið er með liti og einföld form á nokkuð sannfærandi hátt. Litir eru grípandi og einföld form mynda skýrar fígúrur sem leika saman á fletinum. Hugsað hefur verið fyrir heildrænu útliti á öllum hliðum kerrunnar.
Dómnefnd sagði þetta um hönnun John Berniel : Unnið er með minni úr íþróttaheiminum og vísað er í litapallettu félagsins á snjallan máta. Mannsformin gefa tilfinningu um kraft og keppni.
Fjöldi tillagna bárust og reyndist það dómnefnd erfit að velja vinningstillöguna. Dómnefnd skipuðu þau: Hrefna Sigurðardóttir, lektor við hönnunardeild Listaháskóla Íslands, Frosti Gnarr, kynningarstjóri Listaháskóla Íslands, og Valdimar Smári Gunnarsson, verkefnastjóri Allir með.
Kolfinna segir gaman að taka þátt í hönnunarverkefni sem þessu:
„Það er alltaf ótrúlega gaman að taka þátt í svona verkefni. Það er mjög mikilvægt og hvetjandi fyrir bæði unga hönnuði og alla að fá að vera með af því að það vantar svona vettvang. Það er líka svo gott að hvetja skapandi ungt fólk til að nýta hæfileika sína og taka þátt í hönnunarkeppnum. Ég gerði það sjálf á grunnskólaaldri og það var ótrúlega gaman.“
Um Allir með verkefnið:
„Allir með“ er verkefni sem gengur út á að fjölga tækifærum fyrir fötluð börn í íþróttum.
Að verkefninu stendur íþróttahreyfingin (Ungmennafélag Íslands, Íþrótta- og Ólympíusamband Íslands og Íþróttasamband fatlaðra.
Á Íslandi eru rúmlega þrjú þúsund fötluð börn sautján ára og yngri. Einungis fjögur prósent þeirra eru í skipulegu íþróttastarfi. Þessu verðum við sem þjóð að breyta og það ætlum við að gera með „Allir með“ verkefninu.
Eins og fram hefur komið þá er verkefnið margþætt og eins geta fatlanir verið margskonar bæði líkamlegar fatlanir og andlegar fatlanir. Ekkert hefur t.d. verið í boði fyrir börn sem eru í hjólastól. Það geta verið margar ástæður fyrir því en stærsta hindrunin er hvað íþróttahjólastólar eru dýrir. Til þess að geta boðið upp á æfingar í boltagreinum eins og hjólastólakörfubolta, hjólastólahandbolti þá þurfa að vera til 10 -12 stólar á hverjum stað. Kostnaðurinn við stólana er það mikill að menn hafa ekki lagt út þann kostnað og því er ekkert í boði fyrir þennan hóp.
Til þess að leysa þetta hefur „verkefnið“ fjárfest í tíu íþróttahjólastólum sem hugmyndin er að hægt verði að flakka með á milli íþróttahúsa í yfir byggðri kerru. Marel hefur aðstoðað okkur við að hanna kerruna þannig að hægt verður að keyra öllum stólunum inn í kerruna án þess að taka þá í sundur.
Ítarlegri upplýsingar veitir: Valdimar Gunnarsson, verkefnastjóri Allir með, í síma 894 8503.
