Íþróttafélagið Fjörður varð um síðustu helgi bikarmeistari í sundi fimmtánda árið í röð. Til þessa er Fjörður eina félagið sem unnið hefur hinn myndarlega Blue-Lagoon bikar sem Bláa Lónið gaf ÍF til keppninnar árið 2013.
Fjörður hlaut 550 stig á mótinu og varð bikarmeistari en annars skiptust stigin svona á milli þátttökuliðanna:
Fjörður – 550
ÍFR – 279
Ösp – 222
Ármann – 54
Óðinn – 48
Á mótinu féllu einnig tvö ný Íslandsmet en þau settu Sonja Sigurðardóttir frá ÍFR og Sigrún Kjartansdóttir frá Firði. Sonja setti Íslandsmetið sitt í flokki S3 þegar hún kom í bakkann á 2:26,87 mín. í 100m baksundi en Sigrún setti sitt met í flokki S16 þegar hún synti á tímanum 7:14,44 mín í 400m skriðsundi.
Stjórn og starfsfólk ÍF þakkar öllum sem komu að framkvæmd mótsins en það gekk vel fyrir sig í sólskinsveðrinu í Laugardal. Til hamingju Fjörður og til hamingju Sonja og Sigrún!
Mynd/ JBÓ: Bikarmeistarar Fjarðar með sigurlaun helgarinnar.
