Hvataverðlaun ÍF árið 2022 hlýtur Karl Þorsteinsson, formaður boccianefndar Íþróttasambands fatlaðra.
Síðustu fjóra áratugi hefur Karl sinnt störfum hjá sambandinu og átt veigamikinn þátt í uppgangi og vinsældum bocciaíþróttarinnar hér á landi. Karl hefur auk stjórnarsetu í íþróttafélaginu Ösp verið formaður boccianefndar ÍF og sem slíkur tekið þátt í undirbúningi og þátttöku Íslands í hinum ýmsu verkefnum sem tengjast bocciaíþróttinni á innlendum og erlendum vettvangi. Þannig hefur hann verið fararstjóri vegna þátttöku Íslands á Norðurlandamótum fatlaðra í boccia auk annarra móta á erlendum vettvangi, gengt formennsku undirbúningsnefndar vegna Norðurlandamóta í boccia sem haldin hafa verið hér á landi, setið sem fulltrúi Íslands í norrænum nefndum um framþróun bocciaíþróttarinnar auk þess sem sannur sjálfboðaliði að vera boðin og búinn til að leggja allri starfsemi ÍF lið.
Framlag hans til íþrótta fatlaðra í landinu verður aldrei kallað annað en ómetanlegt.
Það er Þórhildur Karlsdóttir dóttir Karls sem tekur við Hvataverðlaununum fyrir föður sinn sem staddur er erlendis.
