Bogfimimaðurinn Þorsteinn Halldórsson frá Hróa Hetti hefur lokið keppni í Dubai en þar var barist um tvo síðustu sætin fyrir Paralympics í París. Það er því ljóst að Þorsteinn tekur ekki þátt á Paralympics 2024 en hann hefur lagt mikið á sig síðustu misseri og því súr niðurstaða fyrir okkar mann.
Þorsteinn varð árið 2016 fyrstur Íslendinga til þess að keppa á Paralympics í bogfimi en bæði fyrir Tokyo og núna París mátti litlu muna að honum tækist að endurtaka leikinn og koma sér inn á leikana.
Í dag mætti Þorsteinn keppanda frá Kasakstan og fór útsláttarviðureigning 137-136 Kasakanum í vil eftir æsispennandi rimmu. Þorsteinn keppir í „compound open“ eða opnum flokki trussuboga en 32 einstaklingar hljóta þátttökurétt á Paralympics í karlaflokki hverju sinni.
Myndir/ Úr einkasafni: Þorsteinn við keppni í Dubai. Hann er væntanlegur aftur heim til Íslands á næstu dögum.
