![](https://hvatisport.is/wp-content/uploads/2024/03/FB9A0330-850x491.jpg)
Íslandsmót ÍF í frjálsum innanhúss fór fram í Kaplakrika um síðastliðna helgi. Ármenningar komu, sáu og sigruðu í stigakeppni liða og þá setti Stefanía Daney Guðmundsdóttir, Eik/UFA, nýtt Íslandsmet í 60m hlaupi í flokki T20.
Undirbúningur og framkvæmd mótsins var í höndum frjálsíþróttanefndar ÍF en stjórn ÍF vill einnig koma á framfæri þakklæti til allra þeirra sjálfboðaliða sem hjálpuðu við mótið og skiluðu því í góðri umgjörð.
Stefanía Daney hefur verið í feiknaformi síðustu misseri og nú síðustu helgi þá féll Íslandsmetið sem áður var einnig í hennar eigu í 60m hlaupi. Stefanía kom í mark á tímanum 8,37 sek. sem er myndarleg bæting á fyrra meti en hún hjó einnig nærri Íslandsmeti sínu í langstökki þegar hún stökk 5,16 metra en metið hennar er 5,18 metrar.
Ingeborg Eide Garðarsdóttir, Ármann, lét einnig vel að sér kveða og eftir nýtt Íslandsmet í kúluvarpi í flokki F37 þá náði hún sínu næstlengsta kasti á ferlinum er hún varpaði kúlunni 9,60 metra en Íslandsmet hennar í greininni er 9,73 metrar.
Hér má nálgast öll úrslit mótsins en töluvert var um persónulegar bætingar svo það er óhætt að láta sig hlakka til frjálsíþróttasumarsins 2024.
![](https://hvatisport.is/wp-content/uploads/2024/03/FB9A0417-1024x779.jpg)
Ingeborg Eide náði sínu næstbesta kasti á ferlinum í Kaplakrika!