Kraftlyftingamót Special Olympics fer fram föstudaginn 15. nóvember kl. 14.00 í tengslum við heimsmeistaramót í kraftlyftingum sem fram fer í Ljónagryfjunni Reykjanesbæ dagana 11-16 nóvember.
Þetta mun verða þriðja árið í röð sem Special Olympics dagur í kraftlyftingum er haldinn samhliða þessu heimsmeistaramóti. Kraftlyftingasamband Íslands hefur unnið markvisst með Íþróttasambandi fatlaðra og Special Olympics á Íslandi að því að efla þátttöku fatlaðra í kraftlyftingum og KRAFT hefur stýrt Íslandsmótum ÍF í kraftlyftingum undanfarin ár.
20 Keppendur frá 5 löndum eru skráðir til keppni en þeir koma frá Íslandi, Bretlandi , Rumeniu , Bandaríkjunum, Indland og Kanada. Þar sem mótið er á Íslandi gafst tækifæri til að senda fleiri keppendur á mótið en annars hefði verið og alls verða 7 íslenskir keppendur en það eru þau:
Aníta Ósk Hrafnsdóttir keppir í -63 kg flokki en hún hefur ekki bara æft og keppt í kraftlyftingum því hún hefur einnig verið ötul keppniskona í frjálsum íþróttum og m.a. keppt í hlaupagreinum og langstökki.
Guðrún Hulda Sigurjónsdóttir keppir í +84 kg flokki en hún hefur samhliða kraftlyftingum einnig æft og náð góðum árangri í kastgreinum, bæði í kúluvarpi og í sleggju- og kringlukasti.
María Sigurjónsdóttir er keppandi í +84 kg flokki en hún keppti í kraftlyftingum á Special Olympics 2019 og 2022. Þá keppti hún líka árið 2023 á Special Olympics World Games þar sem hún vann til tvennra gull- og silfurverðlauna.
Sigríður Sigurjónsdóttir keppir í +84 kg flokki og er einnig að æfa frjálsar íþróttir samhliða kraftlyftingaiðkun þar sem hún keppir í kúluvarpi og sleggjukasti.
Guðfinnur Vilhelm Karlsson keppir í -93 kg flokki en hann hefur einnig æft sund um árabil og keppt á mörgum sundmótum á alþjóðavettvangi.
Sigurjón Ólafsson er keppandi í -93 kg og keppti á Special Olympics árið 2023 og eins á Special Olympics World Games sama ár þar sem hann stóð sig með prýði.
Emil Steinar Björnsson keppir í -120 kg flokki en hann æfir líka kastgreinar og hefur unnið til verðlauna, bæði í kúluvarpi, sleggjukasti og kringlukasti.
Að sögn Láru Bogeyjar, hjá KRAFT sem sér um skipulag stefnir allt í að þetta verði stærsti og fjölmennasti keppnisdagur Special Olympics á þessu móti. Streymt er frá heimsmeistarammótinu sem er í fullum gangi. Hægt er að finna streymi mótsins hér. Fólk er hvatt til að koma á morgunn og veita stuðning úr áhorfendapöllunum, aðgangur er ókeypis
