Anna Karólína Vilhjálmsdóttir skrifar
Á ársþingi Lions á Íslandi, laugardaginn 30. maí fékk Magnús Orri Arnarson, afhenta myndavél til notkunar m.a. við heimildamyndagerð vegna heimsleika Special Olympics í Chile 2027. Magnús Orri gerði heimildarmyndina „Sigur fyrir Sjálfsmyndina“ árið 2025 um vetrarheimsleika Special Olympics á Ítalíu en myndin var unnin í samstarfi við Special Olympics á Íslandi. Myndin var sýnd í Bíó Paradís og á RÚV og vakti mikla athygli. Magnús Orri hefur nú ákveðið að gera aðra heimildarmynd, Sigur fyrir Sjálfsmyndina, hluti 2 en þar verður efnið tengt undirbúningi og þátttöku Íslendinga á heimsleikum Special Olympics í Santiago Chile í október 2027.
Magnúsi Orra hafði dreymt um að geta fjármagnað kaup á ákveðinni tegund Canon myndavélar til að nýta við þessa vinnu. Leitað var ráðgjafar hjá Guðrúnu Björt Ingvadóttur hvort Lionshreyfingin gæti stutt þetta verkefni og hún kynnti málið innan Lions á Íslandi. Draumurinn rættist hjá Magnúsi Orra á ársþingi Lions þegar fulltrúar Lionsklúbbsins Ásbjörns afhentu honum slíka vél. Lionshreyfingin öll hefur staðið að baki ÍF og Special Olympics á Íslandi í áratugi auk þess sem aðildarfélög ÍF hafa notið stuðnings lionsklúbba í heimabyggð. Einnig hafa fulltrúar Lions staðið fyrir viðburðum og aðstoðað við mótahald ÍF og aðildarfélaganna. Magnús Orri fékk einnig sérstakt skjals sem afhent var af Önnu Fr Blöndal fjölumdæmisstjór Lions á Íslandi þar sem fram komu hamingjuóskir og hvatning frá Lionshreyfingunni á Íslandi
Magnús Orri þakkaði ómetanlegan stuðning og sýndi myndband sem hann hafði gert sérstaklega til kynningar fyrir þingfulltrúa og fólk fagnaði með miklu lófataki.
Anna Karólína Vilhjálmsdóttir, framkvæmdastjóri Special Olympics á Íslandi, þakkaði fulltrúum Lionsklúbbsins Ásbjörns fyrir stuðning við heimildarmyndina og Lionshreyfingunni á Íslandi fyrir áratuga mikilvægt samstarf við ÍF og Special Olympics á Íslandi. Með Magnúsi á þessum viðburði var einnig móðir hans Ingibjörg G Marísdóttir sem var yfir sig stolt af sínum manni.
Það ríkti sérstakur andi á þessu ársþingi sem fulltrúar Special Olympics á Íslandi sóttu á laugardaginn. Frábærar móttökur og stuðningur þingfulltrúa veitti Magnúsi Orra mikla gleði og hvetur hann til áframhaldandi verka.
