Opna franska meistaramótið í frjálsum stendur nú yfir í París en það er síðasta stórmótið í frjálsum fyrir Paralympics sem fara líka fram í París í Frakklandi í ágúst- og septembermánuði næstkomandi. Frjálsíþróttakonunar Ingeborg Eide Garðarsdóttir og Stefanía Daney Guðmundsdóttir eru báðar staddar í París um þessar mundir og freista þess að vinna sér inn farseðilinn á Paralympics.
Ingeborg Eide tók sig til í gær og sigraði í kúluvarpi í flokki F37 þar sem hennar lengsta kast var 9,46 metrar. Íslandsmetið hennar í greininni er 9,83 metrar sem hún setti í Jesolo á Ítalíu fyrr á þessu ári. Þar með hefur Ingeborg kastað nokkrum sinnum yfir svokölluð „high performance“ markmiði fyrir Paralympics og þar með gert sig mjög líklega til þess að öðlast sæti í París. Alþjóða Ólympíuhreyfing fatlaðra (IPC) mun fyrir júnílok tilkynna um þá aðila sem öðlast þátttökurétt í frjálsum á Paralympics. Annars glæsilegur sigur hjá Ingeborg í kúlunni í gær en í 2. sæti var hin kóreska Kim Hyeonjeong með lengsta kast upp á 8,89 metra.
Í dag keppti svo Stefanía Daney Guðmundsdóttir í langstökki þar sem hennar lengsta stökk var 4,89 metrar og það dugði henni til sigurs í flokknum og því koma þær stöllur aftur til Íslands um helgina með gullverðlaun í farteskinu. Nú er hinsvegar bara að bíða átekta og sjá hvernig úthlutun sæta fer fyrir París og hvort Island verði með í þeirri úthlutun.
Mynd/ Laurent Bagins – Ingeborg Eide fagnaði vel í gær eftir sigurinn á opna franska í kúluvarpi F37
