Nýárssundmót Íþróttasambands fatlaðra fór fram í Laugardalalsug í dag. Mótið fer fram árlega við fyrstu helgi ársins. Rósa Kristín Kristmannsdóttir sundkona frá Ármanni vann besta afrek mótsins og hlaut fyrir vikið Sjómannabikarinn.
Andri Stefánsson framkvæmdastjóri Íþrótta- og Ólympíusambands Íslands og Auður Inga Þorsteinsdóttir framkvæmdastjóri UMFÍ voru heiðursgestir við mótið og afhentu verðlaun og sjálfan Sjómannabikarinn.
Að þessu sinni var mótið nokkuð smátt í sniðum en Nýárssundmót ÍF er fyrir fötluð börn og ungmenni 17 ára og yngri. Við mótið er boðið upp á keppnisgreinar í 25m laug og þar er t.d. hægt að synda 25m grein með aðstoðarfólki, kút, kork og því hentugt einstaklingum af öllum getustigum 17 ára og yngri.
Sumir keppendur komu jafnvel langt að en þar má t.d. nefna Sigurrósu Freyju Birgisdóttur frá Ungmennafélagi Bolungarvíkur. Við þökkum íþróttakrökkunum fyrir þátttökuna og hlökkum til að halda mótið að ári liðnu.
Mynd/ Rósa Kristín með Sjómannabikarinn í Laugardalslaug
