Sundmaðurinn Snævar Örn Kristmannsson kláraði sitt fyrsta heimsmeistaramót VIRTUS í Tælandi með stæl þegar hann lenti í 5. sæti í 50 metra skriðsundi og bætti Íslandsmetið sitt í greininni tvisvar sinnum.
Snævar hóf daginn í undanrásum þar sem hann synti á 26,99 sekúndum, bætti þar með fyrra Íslandsmetið sitt sem var 27,03 sek og tryggði sér sæti í úrslitum með sjöunda besta tímann. Þar steig hann upp enn á ný og synti á 26,61 sekúndu sem skilaði honum fimmta sæti og var sá tími aðeins 48 sekúndubrotum á eftir bronsverðlaunahafanum.
Snævar kemur því heim með þrjú silfurverðlaun og fjögur Íslandsmet í farteskinu eftir frábæran árangur!
Til hamingju Snævar!
Myndir/ Bergrún
