Hinn árlegi Paralympic-dagur Íþróttasambands fatlaðra fór að nýju fram eftir heimsfaraldur COVID-19. Í ár fór Paralympic-dagurinn fram á alþjóðadegi fatlaðra eða 3. desember og sem fyrr var um stóran og skemmtilegan kynningardag að ræða á íþróttum og lýðheilsu fatlaðra.
Fjöldamargir lögðu leið sína í Frjálsíþróttahöllina í Laugardal þar sem íþróttafélög, einstaklingar og stofnanir kynntu starfsemi sína. Íþróttanefndir ÍF og nemar frá Háskólanum í Reykjavík settu einnig skemmtilegan svip á daginn.
Um afar fjölbreyttar kynningar var að ræða eins og pílukast, borðtennis, körfubolta, blindrafótbolta, lyftingar, júdó, bogfimi, blindrabolta (goalball), nútíma fimleika, dans, boccia, frjálsar og margt fleira.
Íþróttasamband fatlaðra vill koma á framfæri innilegu þakklæti til allra þeirra sem heimsóttu Paralympic-daginn sem og þeim fjölmörgu sjálfboðaliðum sem gerðu daginn eins vel úr garði og raun bara vitni.
Ljóst er að Paralympic-dagurinn er öflugur vettvangur til þess að kynna þá íþrótta- og lýðheilsumöguleika sem eru þegar í boði og eins til að kynna nýjungar í heilbrigðum lífstíl.
Hér að neðan má sjá skemmtilegt myndband sem Magnús Orri Arnarson setti saman frá Paralympic-deginum 2022
https://www.facebook.com/IthrottasambandFatladra/videos/1322348158587518
