Nú þegar Vetrarólympíuleikarnir eru enn í fullum skrúða var Íslandi að berast frábær tíðindi en Arna Sigríður Albertsdóttir hefur hlotið þátttökurétt á Vetrar Paralympics í skíðagöngu en leikarnir fara fram dagana 6.-15. mars næstkomandi.
Eins og flestum er kunnugt fara Ólympíuleikar og Paralympics fram við sömu aðstæður í sama landi enda orðið hluti af einu og sama útboðinu þegar kemur að því að velja gestgjafaþjóðir leikanna.
Arna Sigríður verður þar með fyrst íslenskra kvenna til að keppa í skíðagöngu á Vetrar Paralympics og líka fyrst íslenskra kvenna til að taka bæði þátt í sumar og vetrar Paralympics! Arna var fulltrúi Íslands á Paralympics í handahjólreiðum sem fram fóru í Tokyo 2020 (2021).
Íþróttasamband fatlaðra óskar Örnu Sigríði innilega til hamingju með keppnissætið á leikunum en hún er einmitt stödd í Noregi núna við æfingar og undirbúning.
