Íslands- og unglingameistaramótið í 25 metra laug fór fram í Ásvallalaug í Hafnarfirði um síðustu helgi, dagana 13.–15. nóvember. Mótið var haldið í samstarfi við Sundsamband Íslands (SSÍ) og gekk afar vel fyrir sig.
Á föstudeginum synti Agnetha Ýr Guðmundsdóttir frá Breiðabliki 50 metra baksund á tímanum 37,45 sekúndum og setti þar með fyrsta Íslandsmetið í flokki S19 kvenna, sem er keppnisflokkur einstaklinga með einhverfu. Þetta var í fyrsta sinn sem kona keppti í þessum flokki á Íslandsmóti.
Flokkur S19 tilheyrir flokki III hjá VIRTUS (áður INAS-Fid), sem eru heimssamtök íþróttafólks með þroskahamlanir, einhverfugreiningar, Downs-heilkenni og aðrar líkamlegar takmarkanir. Ísland hefur um árabil átt virka aðild að samtökunum, en árið 2027 verða VIRTUS Global Games haldnir í Egyptalandi. Það eru stærstu leikar samtakanna og fara fram fjórða hvert ár.
