Síðastliðinn fimmtudag, 11. júlí, var haldinn hittingur með afrekshópi Íþróttasambands fatlaðra (ÍF) og voru þar mætt bæði íþróttafólk sem hefur tryggt sér þátttökurétt á Paralympics, og annað afreksíþróttafólk, sem ekki mun fara á leikana að þessu sinni. Paralympics hefst í lok ágúst.
Vésteinn Hafsteinsson, Afreksstjóri ÍSÍ hélt erindi fyrir íþróttafólkið þar sem hann sagði frá Ólympíuleikunum sem framundan eru og hvatti íþróttafólkið til dáða á sinni vegferð. Brynja Guðjónsdóttir, sérfræðingur á Afrekssviði ÍSÍ og fararstjóri á Ólympíuleikunum, fór yfir aðstæður á leikunum og í Ólympíuþorpinu og upplýsti um það sem í boði er fyrir íþróttafólkið.
Ólafur Magnússon, framkvæmdastjóri ÍF, og Jón Björn Ólafsson, forstöðumaður þjónustusviðs ÍF, voru einnig mættir fyrir hönd ÍF og tóku þátt í samverunni. Í framhaldinu voru svo umræður og spurningar frá íþróttafólkinu og létt spjall frá öllum þátttakendum.
Íþróttafólkið sem hefur nú þegar tryggt sér þátttökurétt á Paralympics eru Már Gunnarsson, Róbert Ísak Jónsson, Sonja Sigurðardóttir og Thelma Björg Björnsdóttir, sem öll keppa í sundi. Ingeborg Eide Garðarsdóttir er sú eina í hópnum sem keppir í frjálsum íþróttum.
